न्यूयोर्कको John F. Kennedy (JFK) अन्तर्राष्ट्रिय विमानस्थलमा केही दिनअघि घटेको एउटा रहस्यमयी घटनाले अहिले विश्वभरका दर्शकहरूलाई चकित पारेको छ। सामाजिक सञ्जालमा भाइरल भएको एक भिडियोमा देखिन्छ—एक महिला आत्मविश्वासका साथ इमिग्रेसन अफिसरसामु “Torenza” नामको देशको पासपोर्ट पेश गर्दै प्रवेश प्रक्रिया गर्दैछिन्। तर सबैभन्दा अचम्मको कुरा के भने, यस्तो देश विश्वको कुनै पनि नक्सा वा सरकारी अभिलेखमा छैन।
भिडियोमा ती महिलाले आफू Caucasus क्षेत्रबाट आएको बताउँछिन्। उनले शान्त मुद्रामा अधिकारीलाई भनिन्— “म Torenza बाट आएको हुँ, यो Caucasus तिर पर्छ।” तर जब अमेरिकी अधिकारीहरूले उक्त देशबारे अन्तर्राष्ट्रिय रेकर्ड खोजे, परिणाम शून्य देखियो। विश्वमै कुनै पनि देश वा सन्दर्भमा ‘Torenza’ नामक स्थानको उल्लेख नै नभएपछि उक्त घटना तुरुन्तै अनलाइनमा सनसनी बन्यो।
भिडियो सर्वप्रथम TikTok र Instagram मा देखा परेको थियो र केही घण्टामै लाखौँ भ्यूज पायो। मानिसहरूले यो क्लिपलाई साझा गर्दै विभिन्न सिद्धान्तहरू अघि सारे— कोही भन्छन् यो महिला “parallel universe” बाट आएकी हुन्, कोही भन्छन् यो कुनै “deepfake prank” मात्र हो। भिडियोमा देखिएको पासपोर्ट र महिलाको हाउभाउ अत्यन्त यथार्थजस्तो देखिए पनि, विशेषज्ञहरूले यसलाई AI-Generated misinformation हुनसक्ने ठानिरहेका छन्।
एआई प्रविधिको तीव्र विकाससँगै अहिले यस्ता “साँचोजस्ता तर नक्कली” दृश्यहरू बनाउने क्षमता धेरै बढेको छ। अनुहार, आवाज, बोली र भावनासम्म नक्कल गर्न सक्ने एआईले अहिले यथार्थ र भ्रमबीचको सीमा नै धमिलो बनाइरहेको छ। यही कारणले यो भिडियोले थप शंका र डर पैदा गरेको छ— के अब हामीले देख्ने र सुन्ने सबै कुरा साँचो हुने ग्यारेन्टी रह्यो त ?